القوزي الشامي (على طريقة ام لؤي)

القوزي الشامي (على طريقة ام لؤي )

من طرف ام لؤي, في 05/05/2009 على الساعة 15:30
اولا هذه الاكلة خرج عزايم ومناسبات كبيره وبتبيض الوجه وممكن تنعمل بخروف كامل او قطع لحم خروف او بالدجاج .
ثانيا بعملها من فتره لفتره وبتذكر والدي لانه كان يحبها من ايدي الله يرحمه .
ثالثا وهو المهم انه تعلمتها بالصدفه او يمكن ربنا اراد لي ان اتعلمها واتقنها من مصدر يكون فهمان فيها . وبدي احكي لكم قصة تعلمي اياها .
في سنة من السنوات انعزمنا عن احد اصدقاء والدي على الغداء وهذا الكلام في الرياض وماكنت طبعا متجوزه لسه كنت اعتبر صغيره . المهم انو الرجال شدد على الحضور بدري وانه احنا عيلة ومن هالكلام .طبعا كنت مستغربة من هالنقطة لكن صار انه ذهبنا حوالي الساعة العاشره صباحا واستقبلتنا ست البيت احسن استقبال وهي سيده كبيرة في السن ومجوزه كل اولادها ولا يوجد معها في البيت الا زوجة اصغر ابنائها وابنة كبيرة مخطوبة وعلى وجه زواج .المهم كانت هذه السيده رايحه جاية على المطبخ ولحالها وكنتها وبنتها ولا هم في المود ولا مساعده ولا شيء .تململت في الجلسة انا وبعدين عرضت عليها المساعده وهي رحبت ودخلت المطبخ ووجدتها في بداية الطبخه واتحدث معها وماخده راحتي ورادار ام لؤي شغال بالموضوع لغاية ما حفظت الطبخه وكل ما يتعلق بها من اسئلة عرفتها وعندما رجعنا البيت عرفت انه والدي جدا عجبته الطبخه وخبرته اني حفظتها وصرت اطبخها بالبيت .
رابعا هذه الاكلة هي القوزي الشامي ويوجد منها في المطبخ الخليجي شبيه بها ولكن لا يوجد به الخضار .
المطلوب والطريقه
في وعاء نضع اللحم القطع او الدجاج المغسول ليسلق مع الماء ونشيل الزفره ثم نضيف بهار حلو وملح وهيل وقرفة وورق لورا ونتركه حتى ينضج .
في هذه الاثناء نضع في وعاء كبير بصلة محمرة بزيت ذرة ثم نضيف لحمه مفرومه حوالي نصف كيلو او اكثر او اقل نقلبه مع البصل ثم نضيف بازيلا ومكعبات من الجزر وذره ونقلبة ونضع شوية بهارات وملح ونتركه حتى ينضج على نار هاديه .
على جنب ننقع الارز المزه بسمتي الهندي بالماء والملح .
عندما تنضج اللحمه المفرومه مع الخضار نشيل نصف الكمية في صحن ونتركه على جهة لانه سيستخدم في التزيين .
في وعاء الخضار واللحمه المفرومه نضع الارز بعد ما صفيناه من الماء ونقلب الكل ونضيف القرنفل وفلفل اسود وبهارات حلوة وكركم ثم نصفي مرقة اللحم عليه ونحركه ونتركه على نار عاليه قليلا ثم نهديء النار ونترك الارز يستوي بهدوء وعلى الوجه بنحط قطعة زبده صغيره .
قطع اللحم او الدجاج نحمرها بالفرن حتى تاخذ لون حلو .
عند التقديم نفرش الارز في صينية التقديم ونضع عليها من الخضار الي تركناه للتزيين ثم نضع اللحم او الدجاج المحمر ثم على الوجه نضيف اللوز والصنوبر والكاجو المحمرين او اي نوع مكسرات بنحبها .
في حالة استعمال الخروف كامل نفس تقلية اللحمه بالخضار نعملها ولكن ما بنشيل شيء منها وبنزل عليها الارز المنقوع وبنستويه نص استواء باضافة القليل من الماء ويحشى فيها الخروف الي مبهر من قبل .بس الخروف لازم يكون صغير يعني ما يزيد عن 9 كيلو واذا اقل بيكون اطيب .
بعد حشي الخروف بهذه الحشوة يخيط ويكتف (علشان يقعد عاقل في الفرن ) ويغطى بالقصدير جيدا يعني ينكتم وما يطلع اي بخار بره ويوضع في صينية في الفرن ويدخل الى فرن حامي وعالي لمدة ربع ساعه ثم نوسط الفرن ويترك لمدة ساعه ويقلب وتهدا النار ويترك لغاية ما ينضج ونشيل القصدير ويحمر.
الارز المتبقي من الحشو نزيد عليه ماء وملح ونكمل نضجه ونفرشه في صينية التقديم وعليه الخروف وفوقهم المكسرات ويقدم .
طبعا يؤكل مع هذا الطبق السلطة الخضراء وممكن سلطة اللبن كمان .ورحم الله من علمتني اياها .
ويارب عوافي على قلبكم جميعا .
نتائج البحث عن "القوزي الشامي (على طريقة ام لؤي )"
9 ردود
الرد
1 Eng.Ghadeer, في 05/05/2009 على الساعة 16:58
أولاً:الله يعطيكي العافية يا ام لؤي بعد هالمجهود في الكتابة.
ثانياً:يسلمو اديكي وعينيكي على هالأكلة الزاكية واللي بتفتح النفس...وفيها الحكاية جاج وخرفان يعني اشي غير شكل


ثالثاً:احنا بنسمي هادا الرز المفلفل بالبازيلا والجزر واللحمة (رز معمر)...وممكن يتاكل معاه الجاج متل ما قلتي أو اللحمة قطع كبيرة ومحمرة.
رابعاً:أنا بسمع عن القوزي في بيجيبوا الجلاش اللي حكتلك عنو بس المصري اللي عبارة عن طبقات رقيقة وبيعملوه على شكل قاعدة ولها حواف يوضع الرز هادا اللي قلتي عليه واللي اسمو عنا معمر في داخل قطعة الجلاش ويشوى بالفرن ويؤكل معه دجاج محمر...بس احنا ولا مرة اعملناه...بيقولو زااكي.
خامساً:ماشالله عليكي من صغرك وانتي باين عليكي معدلة وعندك حب استطلاع لكل ما هو جديد ورادارك شغال على طول..وهادا اشي مميز أكيييد.
سادساً:رحم الله والدك ووالدتك ومن علمتك الطبخة.
سابعاً و أخيراً:فتحتي نفسنا على هالأكلة واجت على بالي ناكلها ان شاء الله.

تحياتي الك ومودتي ويعطيكي الف عافية :)
2 ام لؤي, في 05/05/2009 على الساعة 19:12
يا هلا فيكي يا غدير
انا بعرف الرز المعمر وهو اكلة مصرية توضع بالفرن في اواني فخار او بصينيه وبيحطو معها زغاليل اوبط وبيدخل فيها الحليب والزبده .اما بالخضار اول مره بسمع بس طبعا بحب اتعرف على الاشياء الجديده .
وفعلا هناك القوزي الي بالكلاج بنحط العجينة بعد فردها بزبديه كقاعده وطالعه اطرافها لبره ثم نضع مكسرات ثم خلطة الارز بالخضار واللحمه المفرومه وطبعا الارز بيكون كامل الاستواء .ثم نرد الاطراف على بعض ونقلبها في صينيه مدهونه بالزيت ونكمل الصينيه كلها من هده البكج (تسمى بكج القوزي )ونرجع ندهن الوجه بالزيت او الزبده السايحه وتدخل الصينيه الفرن ومجرد تاخد لون من تحت وفوق يعني تتحمر وتقدم ساخنه وتؤكل بجانب السلطة واللبن وهده بعرفها وعنا ناس شوام كتير بيعملوها .
اما حكاية حب الاستطلاع بصراحة كتير بحب اعرف عن عادات الناس وتقاليدهم واكلاتهم طبعا بالشيء المعقول .
وبصراحه يا غدير هذه اكلة طيبه وبتستاهل تجربيها واكيد رح اتحبيها .
وشاكره لمرورك العطر يا نوارة .
تحياتي ومحبتي .
3 Eng.Ghadeer, في 05/05/2009 على الساعة 19:18
أكييييد راح أجربها ان شاء الله

وشكراً الك انك قلتيلي كمان طريقة القوزي بالجلاج بالضبط عشان هادي بدي اعملها كمااان...كنت نفسي أجربها بس مش عارفة ليش ما عمرنا طبخناها...

تحياتي الك ومودتي
4 Haider Mohammed, في 05/05/2009 على الساعة 20:00
شكراً أخت أم لؤي على الأكله الطيبه
والله ذكرتيني بالوالده رحمها الله في طريقة إعدادك الطبخه ، ماشاء الله عليكي ، شعبونيه بصحيح وإلك نفس في الطبيخ .
الحجه أم محمد ( زوجتي من عيلة مراد وأمها أبو شعبان ) بتعملها باستمرار وكما قلتي في العزايم ، بس الحجه بتعملها دائماً على دجاج ولم نجربها على لحمه بعد ، بس يبدو أنها طيبه أيضاً .
أما الخروف الأوزي ( في الفرن ) فلم نعد نحشيه بالرز واللحمه ( كنّا سابقا نحشيه ثم وجدنا أنه شغلانه وغلبه ) ، بل نضعه كما هو في الفرن ( خروف مكتف وجوعان ) ونفلفل الرز باللحم المفروم والبهارات الصحيحه الكامله ( غير مطحونه ) بجانبه والذي يجلل بالمكسرات على وجهه في الصينيه كما ذكرتي آنفاً . وهي من الأكلات المشهود للحجه أم محمد بها .
وهذه بعض الصور من النت علها تفي بالغرض :





سلمت يداك وتقبلي مروري وتعليقي.[img][/img]
5 Eng.Ghadeer, في 05/05/2009 على الساعة 20:16
واتفضلي هادي يا ام لؤي صورة من عنا في البيت الخروف المحشي ...بس هادا مش اوزي هادا لارج خروووف....



الصورة لتفتح نفسكم على الأكل
6 ام لؤي, في 06/05/2009 على الساعة 11:29
يا هلا بيك يا مختارنا
والله يرحم الوالده ويغفر الها وجميع موتانا يارب.
والله يخلي لك الحاجة ام محمد هي البركة كلها .
ومشكور يا مختارنا على الصور الجميلة واكيد تفي بالغرض .
وشكرا لمرورك العطر يا مختارنا الكريم
تحياتي واحترامي .
7 ام لؤي, في 06/05/2009 على الساعة 11:34
شلهمتينا يا غدير على الخروف اللارج هدا
ما شاء الله لاقوة الا بالله ياريته الف هنا وعافيه
وان شاء الله دايما تجتمعو بسعاده حول سفر طيبة
والف شكر يا نوارة
8 ام سامر, في 06/05/2009 على الساعة 19:01
£$%; ويسلموا يا ام لؤي يا ست الكل...طيبه كتير وانا بعملها بس بالرز المصري هيك بحبوها...ومرات بالدجاج او باللحمه..
9 ام لؤي, في 06/05/2009 على الساعة 20:48
يا هلا بست الكل ام سامر البركة
وحمد لله على رجوعك الينا هنا في الديوان
وصحيح في ناس بتعملها بالرز المصري وكمان بتكون طيبه وان شاء الله الف عافيه .
وشكرا لمرورك العطر يا ام سامر
تحياتي ومودتي .

تسلمي يا غالية والله لا يحرمنا من اكلك الصراحة الوزي انا بعملو غير طريقة بس اكتير بشبه طريقتكانا باسلق الدجاج لوحده والارز المبهر بالبهارات القرفو لوحدة والخضار باستويها بشوية زيت قلي وبعمل لحمة مفرومة لوحدها بقليها مع البهار الخاص فيها وعند التقديم في طريقتين الاولي بحط الارز في الصينية وفوقها الخضار بعدين اللحمة المفرومة والمكسرات وفوق كل اشي بحط الدجاج والطريقة الثانية بجيب صحن غويط بحط المكسرات اول شي بعدين اللحمة المفرومة بعدين الخضار بعدين الارز المبهر وبقلبهم قلب في طبق كبير وبحط الدجاج داير ما يدور وصحتين وعافية كتير لذيذة الاكلة اما باللحم انا ماليش فيها الي بالدجاج واللحم المفروم ويسلموا

مشكوووووووووور يا والدنا على مرورك العطر بارك الله فيك .
تقبل تحيتي وتقديري .

الله يسلمك يا منوش ياقمر .
بالفعل تتعدد الطرق لعمل القوزي ولكن في النهاية لا نختلف على انها اكلة طيبة ومطلوبة .
اشكر لك مرورك الجميل بارك الله فيكي .
تقبلي تحيتي ومحبتي .

هادي طريقة في تقديم الاوزي مع شيش طاوق مشوي سلطة ملفوف مايونيز وسلطة ذرة مايونيز وبطاطا وصحتين وعافية

فتحتي نفسي يا منوش بهالصورة الحلوة
يعطيكي العافية والف شكر ياغالية .
تقبلي تحيتي

صحة وعافية يا غالية بس انتي تعالي علي غزة واعملك الي تحبيه

ما شاء الله عليكى يابنت العمه الغاليه على الاكله اللذيذه
انا بعملها بردو بالعزايم واحيانا جنب طبيخ البازيلاء
اكله طيبه وبتشهى بعملها على لحمه مفرومه ودجاج نفس طريقتك بس انا بسميها الارز بالخضار او الارز الاوزي
والله ياعم شعبوبيه ونفس شعبونى طالعه لعمت امك الله يرحمهم جميعا ام جبريل
اللهم صلى على سيدنا محمد

اهلا بتواجدك يا احلى ام محمد
قد يختلف اسم هذه الاكلة من شخص لآخر ولكنها في النهاية اكلة طيبة ومحبوبة .
وشرف الي اكون طالعة لعمة والدتي رحمها الله يعني شعبونية صميم .
مشكوورة ياغالية على المرور والتعليق ويعطيكي العافية والرضا .
تقبلي تحيتي ومحبتي .