سمك الارملة _من أكلات جدتي (على طريقة ام لؤي)

سمك الارملة _من اكلات جدتي (على طريقة ام لؤي )

من طرف ام لؤي, في 06/06/2009 على الساعة 19:03
هدا ياجماعة الخير اكلتنا اليوم سهلة وبسيطة وقديمة جدا ويقال ان الارملة التي فقدت زوجها حينما تشتهي السمك ولا تجد من يحضره لها تستعيض بهذه الاكلة السهلة عنه .
المطلوب والطريقة :
حبتين من الباذنجان المقطع شرائح ومقلي بزيت ذرة
يفسخ الباذنجان بعد قليه ويوضع في طبق التقديم .
نقوم بعمل تقلاية طماطم عادية وذلك بتقطيع شرائح من الطماطم ووضعها في مقلى مع القليل من الزيت والملح ووضع الثوم والفلفل الحار حسب الرغبة والكمية التي نريد ويترك على نار هادية حتى ينضج ويتلاشي الكثير من الماء الناتج عن الطماطم ويتسبك قليلا .
نضيف التقلاية على وجه وعاء الباذنجان المفسخ ويمكن اضافة عصير الليمون لمن يحب ويؤكل بجانب الزيتون والمخللات .
وعوافي يارب .
نتائج البحث عن "سمك الارملة _من اكلات جدتي (على طريقة ام لؤي )"
15 ردود
الرد
1 عبير, في 06/06/2009 على الساعة 19:17
ههههههههه اخت ام لؤي طلعت الوصفة مالهاش دعوة بالسمك اطلاقا

يا ويلي عليها الأرملة

انا مش عارفة انتي من وين بتجيبي هالأسماء الغريبة اكيد من ستك
هههههه سمك الارملة وابونا الخليل اللي مسمط

اول مرة اسمع أسامي هالأكلات الغريبة

بس بدي اسأل كيف يعني الباذنجان مفسخ

تقبلي تحياتي
2 ام لؤي, في 06/06/2009 على الساعة 19:26
يا هلا بيكي ياعبير الورد
اول شيء يابنت الحلال انا مابجيب شيء من عندي هذا تراث قديم وانا بنقله فقط وما الي اي دخل بالاسماء .
ثانيا باذنجان مفسخ يعني بعد ماقليتي الباذنجان الشرائح ترجعي تقطعيه الى شرايح رفيعه هذا اسمه بلغة اهل زمان تفسيخ علشان خلطة التقلاية تتداخل في كل الباذنجان وتعطيه طعم طيب .
وبعدين اذا بدك شيء عن وصفة قديمة اساليني يمكن اجاوبك لانه طول عمري بحب الستات العجايز الكبار وبحب جلستهم واكلاتهم وخبرتهم بحس بمتعه وبستفيد منهم يا عبورة .
وشكرا لك ولتعليقك المميز ومرورك الذي يسعدني
محبتي لك .
3 Eng.Ghadeer, في 06/06/2009 على الساعة 20:02
هههههههه.....يا عيني عليكي يا ام لؤي...فعلاً أسماء غريبة..حلو كتير انك تعرفينا احنا الجيل الجديد بهادي الأسامي وهادي الوصفات..مشكووووورة

لكن ايش دخل السمك بالباذنجان يعني وحدة ارملة اشتهت سمك تروح تعمل بتنجان بدالو يا ويلي عليها!!!

فعلاً هي اكلة فلسطينية قديمة وانقرضت لأنو ما حد بيعملها ..شكراً انك ذكرتينا فيها وبركي يوم بنجربها ان شاء الله...

تحيتي ومودتي
4 عبير, في 06/06/2009 على الساعة 20:06
مشكورة اخت ام لؤي على التعليق
انا عارفة انك مالك دعوة بالاسماء انا كنت بمزح هههههههه
عشان الاسماء غريبة على

تقبل مروري
5 ام لؤي, في 06/06/2009 على الساعة 21:47
ياهلا بغدير النوارة
بالفعل ايش جاب البتنجان للسمك ؟؟؟
لكن لما كنت اسال ستي هيك اتقول لي انه هي مشتهية السمك ومافي حدا يجيب الها اياه فبتعمل اكلة تانية وهي بتاكل بتوهم نفسها انه مشابه للسمك وربنا يعينها برضو .
وهذه من اكلات زمان المميزه وبما اني بحب الباذنجان فبعملها من وقت للتاني .جربيها ياغدير وناديني بقوم بالواجب ههههههههه .
شاكرة لك مرورك الكريم يا قمر
تحياتي لك .
6 ام لؤي, في 06/06/2009 على الساعة 21:50
والله فعلا ياعبيرالورد الاسماء كتير غريبة
هدول اهل زمان ومصطلحاتهم الخاصة فيهم .
وانا عارفة انك بتمزحي وكمان انتي مستغربة الاسماء ومعك حق بصراحة .
محبتي لك ياعبورة.
7 عبير, في 06/06/2009 على الساعة 21:51
عندي سؤال اخت ام لؤي
الباذنجان نقليه مقشر ولا بقشره

لكي تحياتي
8 ام لؤي, في 06/06/2009 على الساعة 21:57
اهلا بكي ياعبير الورد
الباذنجان ياقمر نقليه بعد تقشيرة وتقطيعه شرائح .
وشكرالك على الاستفسار وهذا بيدل على ست شطورة بارك الله فيكي .
محبتي لك .
9 ام سامر, في 07/06/2009 على الساعة 05:00
والله وصفاتك غريبه وعجيبه يا ام لؤي مع انك مش كبيره بالعمر كتير, صبيه ماشالله عنك بس متذكره هالوصفات القديمه ..انا بعمله البتنجان بس بدون بندوره بقليه وبفسخه وبدق توم وفلفل وليمون "كنت"هلا بطلت لان الفلفل الحار بيضرنا كلنا..ممكن بالفلفل الحلو..بس ما بسميه الارمله بنسميه مفسخ بتنجان..
اشكر لك الوصفات المميزه جدا يا اختي الفاضله ام لؤي..
تقبلي تحيتي ومودتي.
10 أبو حلمي, في 07/06/2009 على الساعة 06:46

..انا بعمله البتنجان بس بدون بندوره بقليه وبفسخه وبدق توم وفلفل وليمون "كنت"هلا بطلت لان الفلفل الحار بيضرنا



كمان إحنا لما نزهق من الطبيخ واللحمة بنعمله بطريقة إم سامر

تسلمي إم لؤي ...........وتسلمي إم سامر
11 ام لؤي, في 07/06/2009 على الساعة 10:40
ياهلا فيكي يا ام سامر ياطيبة
وهي اعطيتينا وصفة تانية بارك الله فيكي .
هو صحيح انا مش عجوزة كتير بس بحب اكلات زمان وشغل اهل زمان ومخي بحسه زيهم .
وشكرالمرورك وتعليقك الجميل ياست الكل .
تحياتي لك ومحبتي .
12 ام لؤي, في 07/06/2009 على الساعة 10:42
اهلا بك ياعمنا الحاج بارك الله فيك
شكرا للمرور والتعليق
تحياتي واحترامي لك .
13 عبير, في 07/06/2009 على الساعة 13:08
مشكورة اخت ام لؤي علي الرد

لكي تحياتي
14 Eng.Ghadeer, في 07/06/2009 على الساعة 17:18
اسكتي يا ام لؤي ماش طلعت ستي طول عمرها بتعرف سمك الأرملة هادا...بس بتعملو كانت زمان من غير بندورة يعني زي ام سامر وزي ما بنعمل احنا الآن ...بستغرب ولا مرة قلتلنا هالإسم.....

عارفة الفلافل بيسموه بعض الناس كباب الفقرا....يعني صح الفلافل ملوش دعوة بالكباب بس هيك بسموه..عشان الفقرا بيشتهيو الكباب وما بلاقوه والفلافل دايما متواجد ورخيص
عشان كدا يمكن هادا سموه سمك الأرملة يعني على نفس طريقة التسماية
15 عبير, في 08/06/2009 على الساعة 14:14
والله كويس هي ستي طلعت بتعرف الاكلة يا جماعة

بس عمري ما سمعتها بتحكي عنها