شو افطاركم اليوم

حبيت اعمل تغير شوي انا طرحت سؤال وسؤالي للجميع شو افطاركم اليوم وكل واحد يحكي شو افطر والي بلاقي الاكلة غريبة عليه يسال العضو عنها وعن مكوناتها
انا اليوم افطرت شوربة عدس وارز اوزي وشيش طاووق مشوي وطبعا ما ننسا الطراشي مقدوس وفلفل مكبوس وليمون مكبوسوصحتين للجميع وصوما مقبول ان شاء الله

script src='http://img715.imageshack.us/shareable/?i=20100418502.gif' type='text/javascript'>

اممممممممممممم
موضوع كتير حلو ياريت الكل يشارك
انا افطرت رز قدره وطبيخ لبن طبعما على لحم ضانى وطراشي ودقة جراده عروس المائده الرمضانيه وعصائر خروب وكركديه
وانتو يلا احكو ولا ما طبختو هههههههههههههههه
يسلمو منمن

تسلمي ام محمد وصحتين وعلي العصائر ما تسألي كتيررررر وطبعا علي راسها الخروب والكركديه الواحد ما بياكل علي قد ما بيشرب والله يتمه علي خير وصوم مقبول ان شاء الله

أنا عن نفسي اليوم مفطر إذا ربنا كتبلنا عمر مقلوبة بلحم ضاني وجمبها سلطة إفرنجية وحمص وعصائر نوعين جريب فروت ومندرين كوكتيل

صحتين اخ ابو محمد ولواني لا احب اي شئ مطبوخ بلحم الضاني بس بالنهاية اذواق والمقلوبة زاكية صحتين وان شاء الله صوم مقبول للجميع

اليوم ان الله راد افطوري كفتة مشوية بالصينية وكبدة مشوية مع توم وفلفل والمقبلات طبعا حمص وبطاطا وسلطة الشراب الكولا طبعا والخروب والكركديه وصحتين وعافية للجميع وما ننسي الحلو قطايف بالجوز وقطايف بللبن وجوز الهند

ولواني لا احب اي شئ مطبوخ بلحم الضاني

معقووول ؟

الأكل ما بيكون طيب بدون الضاني فلحم العجول طيب ولكن لا يشّبه بالضاني

اليوم بإذن الله كفتة مع بطاطا وخروب وفتوش

صحتين ان شاء الله اخ ابو محمد اليوم انا طابخة بازيلاء وارز كتير بحب هالكلة وطبعا الخروب والكركديه لا غني عنهم في مائدة رمضان

موضوع حلو كتير يامنوش واتوفقتي فيه ماشاء الله عنك .
طيب كل واحد كتب عن طبخته في رمضان بس نادرا ما اطبخ في رمضان الطبخات المتعارف عليها ويوميا يكون على السفرة طبق السمبوسك بلحم او جبن ونوع من الشوربة ونوع من السلطة اما الطبق الرئيسي فيكون اما لحم مشوي او دجاج او نوع من المحاشي اوالمقبلات من حمص وفول ومتبل باذنجان او شيء من المعجنات بانواعها واحيانا كمان بألغي الطبق الرئيسي لأني بحس الصايم بيحط على السفرة انواع كتيييييييرة وآخرتها ما بيأكل إلى أقل القليل وبيشبع بسرعة .
طبعا فطوري ليوم الربوع كان سمبوسك جبنة ولحمة وشوربة دجاج بالشعيرية وشوية مسخن وطبق فتوش وعصير برتقال وفيمتو ولبن وتمر والحمد لله دائما وأبدا .
مشكووووووورة يامنوش ياقمر وربنا يديم علينا النعمة ويحفظها من الزوال .
تقبلي تحيتي ومحبتي .

وعصير برتقال وفيمتو ولبن وتمر

صحة وعافية يا إم لؤي لكن كله كوم والفيمتو كوم لحاله اللي مش عارف ليش كل أهل برة بيحبوه مع إننو آصانص وبينكسر بماء وبيقولو لدرجة إنو لو السفرة خلت مننو ما بيحسو بطعم رمضان مع إنو جربناه ما عجبنا وسعره عنا مش رخيص الزجاجة 25 شيكل يعني حوالي 20 ريال ولكن الناس بتتهافت عليه خصوصاً اللي كانو من سكان الخليج ولكن إحنا سبحان الله متعودين على العصائر اللي بتيجينا من عند ولاد عمنا اليهود 500 نوع من الفواكه الإستوائية الكوكتيل والعصائر الفريش ولكن الناس أذواق وصحتين وعافية على قلبكم

اليوم بإذن الله طابخين بازيلا وإحتمال أجيب أكم فرشوحة شاورما لأني مش مغرم في البازيلا بجانب البازيلا طبعاً الحمص و الخروب والفتوش والتابوزينا ( عصير برتقال )

صحتين وعافية للجميع ونورتي الغالية ام لؤي والصراحة السمبوسك ما في غنى عنو وعلي راي اخ ابو محمد الفمتو مش كتير ما حبتو انا المشروبات المفضلة في رمضان الخروب والكردكدي وطبعا عمايل البيت مش البرة انا اليوم ان شاء الله عاملة سمبوسك جبنة ولحمة طبعا وعرايس وطبعا شوربة والتحبيش بطاطا وطارشي وسلطات وصوم مقبول ان شاء الله

الله يسلمك يا منوش وصحتين على قلبك .
وبدي احكي لكم قصتنا مع الفيمتو من الاول هذا يا جماعة الخير الفيمتو مشروب اتربينا على شربه من الصغر ولقينا اهلنا بيعملوه ويضيفو له السكر وقطع الثلج وفي رمضان خاصة يعني رمضان بدون فيمتو او شراب توت مش مستساغ وياما انصبغنا بشوارب التوت في الصغر (الي بيشرب توت من الصغار بيعلم على اعلى الفم من صبغة التوت وبيبان انه شارب توت او فيمتو وداخل جو )
بس كمان في ناس مابتحبه ومنهم زوجي مابيستسيغه كتير والناس اذواق .
وبالنسبة للسعر تباع عندنا الزجاجة منه بخمسة ريالات واحيانا اقل واحيانا اكثر بشيء بسيط بس عشرين شيكل زي عندكم اكيد هده مبالغة وطمع من التجار في السعر .
فطوري اليوم سمبوسك لحم وجبنة بعجينة منزلية الصنع مش جاهزة ودجاج محشي وفتوش وشوربة عدس وعصيرات وتمر ولبن ونعمة من الله ربنا لك الحمد والشكر حتى ترضى .
وصياما مقبولا وإفطارا شهيا هنيئا للجميييييييييييييع .

صحتين ام لؤي ان شاء الله وبالله تكتبيلي كيف بتعملي عجينة السمبوسك زي ما بعملها ولا لا

الله يسلمك يا منوش .
السمبوسك البيتي سهل كتير ويتم بعجن ثلاثة اكواب من الدقيق الابيض ومعهم نصف كوب من زيت الذرة وممكن ثلاثة ارباع الكوب لكن التقليل افضل وذرة ملح وماء دافي وممكن اضافة ذرة من البيكنغ بودر وممكن الاستغناء عنها وتعجنيهم كويس ثم يقرص الى اقراص بحجم الليمون البعلي وتترك العجينة لترتاح من ساعتين الى اكثر وهي مغطاة طبعا ثم نباشر بحشوها باللحم المعصج المضاف له البقدونس او الكزبرة او الشبت حسب رغبتنا وتغلق كل حبة ويوضع في صينية ثم نقلي الحبات بزبت غزير ويقدم وطبعا ممكن ان تحشى بالجبنة البيضاء المضاف لها رشة نعنع ناشف او فلفل احمر لو بتحبي الحار او ممكن تحشى بالدجاج المقلب بالبصل والسماق او الدجاج المضاف له الخضار او بالخضار المشكلة الي مقلبينها بطريقة السوتيه يعني الحشوة حسب الرغبة .
وممكن تفريز العجينة وهي محشية بوضعها في صينية ووضعها في الفريزر وحينما تقسى وتجمد توضع في اكياس التفريز ونحتفظ بها للحاجة وصراحة انا بعمل مرة كمية تكفي لثلاث او اربع ايام ثم اعاود الكرة من جديد لانه بناتي واولادي بيفضلوها على عجينة السوق الجاهزة والف صحة وعافية يامنوش ياغالية .
تقبلي تحيتي ومودتي .

اليوم عنا رز قدرة بايت من إمبارح وجمبه حمص بلحمة وطبعاً كالعادة بستفرد بالحمص أبو لحمة بعد ما نطشش عوشه سمنة ولوز مقلي أو صنوبر لو توفر ومخللات من جميع الأنواع وروكة وفجل وصحتين وعافية على قلبي ههههههههههههههههههه

صحتين وعافية اخ ابو محمد ويسلمو اديكي ام لؤي الصراحة طريقة السمبوسك متل ما بعملها بس انا ما بريحها كتير بدي اجرب اريحها ساعتين متل ما انتي بتعملي وانا بحشيها بلحمةوبصل متل حشوة اللحم وعجين او جبنة صفرا بالفلفل الاحمر او جبنة بيضا بالسماق والنعنع بدي اجرب الحشوات الي انتي كتباها ويسلموا اديكي مرة تانية

اليوم الصراحة كنت معزومة عند اخي الغالي الله يخلي الي هو واخوتي وخواتي جميعا يا رب وعلي راسهم والدي والدتي الغالين كان الاكل مشاوي وطبعا مقبلات سلطة ولبن وحمص وسلطة وطراشي والمشاريب خروب ملك السفرة الرمضانية وفانتا تفاح وكولا وسفن والحلو كلاج

والله بكرة مفكرة اعمل ملوخية ان الله احيانا يا رب

انا اليوم فطورنا كان ملوخيه ورق وشوربة خضار وطبعا طراشي وحمص ودقه بجراده انا طول شهر رمضان لازم اعملها وعصير كوكتيل فواكه وخروب والاكل حيره برمضان
ورمضان كريم علينا وعليكم

اكيد مع دجاج محشي طبعا والا ما بتتاكل وانا كتير بحب ملوخية ورق بس للاسف زوجي ما بحبها بس بكلها عند الوالدة الله يطول عمرها يا رب وصحة وعافية يا ام محمد علي قلبك